កាន់តែច្បាស់ហើយ iPhone 8 ចេញឆ្នាំនេះ នឹងមានអង្គចងចាំ ៣ជម្រើស 64GB/256GB/512GB តម្លៃចាប់ពី $៩៩៩ ដល់ $១១៩៩

យើងបានឮដំណឹងចចាមអារ៉ាមមួយចំនួនកន្លងមកហើយអំពីកំពូលទូរស័ព្ទជំនាន់ថ្មី iPhone 8 របស់ Apple ហើយបើតាមប្រភពគណនី Twtter ឈ្មោះ Geskin បានបង្ហោះថ្មីៗនេះ ជាមួយការអះអាងទៅលើតម្លៃស្មាតហ្វូនទំនើបនេះ ថានឹងមានលក់ចាប់ពីតម្លៃ ៩៩៩ដុល្លារ សម្រាប់ម៉ូដែល 64GB។

ដូចយើងបានឃើញនៅក្នុង tweet ដែលគណនី Benjamin Geskin បានលើកឡើង ហាក់មានភាពប្រាកដប្រជាមិនត្រឹមតែតម្លៃប៉ុណ្ណោះទេ តែថែមទាំងបញ្ជាក់នូវទំហំអង្គចងចាំ ៣ទំហំផ្សេងគ្នា ដែលនាំឱ្យតម្លៃក៏ខុសគ្នាទៅតាមនោះដែរ។ គណនី Twitter បានបង្ហោះអំពីតម្លៃខុសគ្នាទៅតាមទំហំអង្គចងចាំផ្សេងគ្នានៅលើ iPhone 8៖

64GB តម្លៃ ៩៩៩ដុល្លារ 256GB តម្លៃ ១០៩៩ដុល្លារ 512GB តម្លៃ ១១៩៩ដុល្លារ

iPhone 8 មានចចាមអារ៉ាមថា នឹងបង្ហាញខ្លួនជាមួយអេក្រង់ទំហំ ៥,៨អ៊ីញ ហើយជា iPhone ដំបូងដែលប្រើអេក្រង់ប្រភេទ OLED។ លក្ខណៈសម្បត្តិផ្សេងទៀតនៅលើ ស្មាតហ្វូនទំនើបរបស់ Apple នេះនឹងបំពាក់បន្ទះឈីប Apple A11 mobile processor និងមាន RAM ទំហំ 3GB។

iPhone 8 ថែមទាំងត្រូវរំពឹងថា នឹងមានការឌីហ្សាញរូបរាងថ្មី ក្រាលដោយកញ្ចក់ និងអមដោយតួផលិតពីដែកអ៊ីណុកប្រភេទ stainless steel។ ពិសេសជាងនេះ iPhone 8 អាចបង្កប់បច្ចេកវិទ្យាសម្គាល់ផ្ទៃមុខ សម្រាប់ដោះសោទូរស័ព្ទ និងប្រើនៅលើសេវាកម្ម Apple Pay។

ទូរស័ព្ទកំពូលជំនាន់ថ្មីនេះ នឹងបំពាក់កាមេរ៉ាភ្លោះ ទម្រង់បញ្ឈរ ហើយនឹងប្រើប្រព័ន្ធប្រតិបត្តិការ iOS 11។ វានឹងត្រូវក្រុមហ៊ុន Apple សម្ពោធចេញផ្លូវការក្នុងព្រឹត្តិការណ៍នៅថ្ងៃទី១២ កញ្ញានេះហើយ៕

ដោយ៖ TheSmey | ចុច៖ Like ទំព័ររបស់ពួកយើងដើម្បីទទួលបាននូវអ្វីដែលថ្មីៗជាច្រើនទៀត
ប្រភព៖ thephnompenhtimes