ក្រុមហ៊ុន Faebook មានមោទនភាពជាខ្លាំងទៅលើការផ្ដួចផ្ដើមគម្រោងចែកអ៊ីនធឺណិតឱ្យប្រើបណ្ដាញសង្គមរបស់ខ្លួនហ្វ្រី។ នេះជាគម្រោងមួយស្ថិតក្នុងគម្រោងធំ Internet.org ដែលនាំយកតំណភ្ជាប់អនឡាញដោយឥតគិតថ្លៃ ទៅកាន់ប្រជាជននៅតាមបណ្ដាប្រទេសកំពុងអភិវឌ្ឍជាង ៦៥ប្រទេស។ ហើយខណៈមានការកោតសរសើរទៅនឹងគម្រោងចិត្តល្អនេះ តែក៏មានភាពចម្រូងចម្រាសកើតឡើងផងដែរ។ ជាក់ស្ដែងថ្មីៗនេះ មានការរិះគន់ពីភ្នាក់ងារព័ត៌មាន Global Voices ដោយបានហៅគម្រោង Free Basics របស់ Facebook ថា គឺជា អាណានិគមឌីជីថល “digital colonialism” ប៉ុណ្ណោះ។
កម្មវិធីទូរស័ព្ទ (mobile app) របស់ Facebook បានផ្ដល់នូវការភ្ជាប់ចូលគេហទំព័រ និងអាចប្រើសេវាកម្មមួយចំនួនឥតគិតថ្លៃ តែមានដែនកំណត់ប៉ុណ្ណោះ។ ជាក់ស្ដែងកម្មវិធី Facebook សម្រាប់ទូរស័ព្ទគឺអាចឱ្យអ្នកប្រើ បើក Facebook បានត្រឹមតែមើលមាតិកាជាអក្សរ (text) ប៉ុណ្ណោះ តែគេមិនអាចមើល Photos និង Videos ដែលបង្ហោះនោះឡើយ ។ បែបនេះហើយ ទើបមានរបាយការណ៍រិះគន់គម្រោងផ្ដល់អ៊ីនធឺណិតហ្វ្រីនេះថា “អ៊ីនធឺណិតខ្សត់ខ្សោយ វាសមនឹងប្រជាជនក្រីក្រអីចឹងដែរ”។
របាយការណ៍របស់ Global Voices បានអះអាងថា Free Basics មិនបានផ្ដល់ឱ្យអ្នកប្រើ នូវតំណភ្ជាប់អ៊ីនធឺណិតពេញលេញដោយឥតគិតថ្លៃនោះឡើយ ផ្ទុយទៅវិញ វាគ្រាន់តែតែសម្រាប់ផ្ដល់ជា អាទិភាពដល់គេហទំព័រមួយចំនួន ពិសេស Facebook ដែលជាសេវាបណ្ដាញសង្គមរបស់ខ្លួនប៉ុណ្ណោះ។ ហើយថែមទាំងមានការចោទប្រកាន់ថា Facebook ដើរតួនាទីជា ក្រុមហ៊ុនផ្គត់ផ្គង់អ៊ីនធឺណិត ISP ដោយប្រើ Free Basic ដើម្បីប្រមូលផ្ដុំទិន្នន័យ metadata ពីអ្នករាល់គ្នាដែលប្រើសេវាកម្មឥតអស់លុយមួយនេះ ដូចជា កម្មវិធីណាដែលកំពុងប្រើ, ប្រើនៅពេលណា និងប្រើរយៈពេលយូរប៉ុណ្ណា?
... ក្រុមហ៊ុន Facebook បម្រុងតអ៊ីនធឺណិត ឱ្យអ្នកនៅអាមេរិកប្រើឥតគិតថ្លៃក្រោមគម្រោង Free Basics របស់ខ្លួន ...
យ៉ាងណា កន្លងទៅ Facebook ធ្លាប់បានថ្លែងការពារសេវារបស់ខ្លួនថា៖ “គោលដៅរបស់យើងជាមួយ Free Basics គឺដើម្បីជួយផ្ដល់នូវបទពិសោធន៍មានតម្លៃ និងពាក់ព័ន្ធទៅនឹងតំណភ្ជាប់ដោយសេរី និងឥតគិតថ្លៃ”។
សូមបញ្ជាក់ថា ឥណ្ឌាធ្លាប់បានប្លុកសេវា Free Basics របស់ Facebook កាលពីឆ្នាំមុន ដោយវាប៉ះពាល់ដល់ច្បាប់អព្យាក្រឹត។ អាជ្ញាធរខាងបទប្បញ្ញត្តិរបស់ប្រទេសនេះ បានសម្រេច មិនអនុញ្ញាតឱ្យដំណើរការសេវាហ្វ្រីអ៊ីនធឺណិតរបស់ Facebook នៅលើទឹកដីរបស់ខ្លួនទេ។ នេះក៏ព្រោះតែ ការផ្ដល់សេវាអ៊ីនធឺណីតហ្វ្រីគឺអាចប៉ះពាល់ដល់ការកំណត់តម្លៃសេវាអ៊ីនធឺណិតរបស់ក្រុមហ៊ុនទូរគមនាគមន៍ឯកជនក្នុងស្រុក (ប្រទេសឥណ្ឌា)។
កន្លងទៅ បណ្ដាក្រុមហ៊ុនទូរគមនាគមន៍មួយចំនួននៅប្រទេសឥណ្ឌា បានបោះបង់ភាពជាដៃគូក្នុងគម្រោង Internet.org របស់ Facebook ហេតុផលគឺដើម្បីការពារអព្យាក្រឹតភាពអ៊ីនធឺណិត។ក្រុមហ៊ុនទូរគមនាគមន៍ឥណ្ឌាទាំងនោះ លើកឡើងថា គម្រោងចែកចាយអ៊ីនធឺណិតដោយឥតគិតថ្លៃដល់ប្រជាជនក្នុងប្រទេសប្រើប្រាស់របស់ Facebook នេះ គឺអាចប៉ះពាល់ដល់តម្លៃចរាចរទិន្នន័យ (data traffic) ព្រោះអ្នកប្រើ (user) មិនចាំបាច់បង់ថ្លៃអ៊ីនធឺណិត ដែលនេះគឺជាការមួយប្រឆាំងទៅនឹងស្មារតីអព្យាក្រឹត៕
ប្រភព៖ thephnompenhtimes
ចុច Like ទំព័ររបស់ពួកយើងដើម្បីទទួលបាននូវអ្វីផ្សេងៗជាច្រើនទៀត
0 comments:
Post a Comment